Hvort segir maður tottklúður eða klúðurtott?

Sagan segir okkur Íslendingum að utanskot "voru" ekki óþekkt áður og fyrr. Sagan á eftir að flytja okkur vitneskju um nútíman. Helv. væri nú dúrt fyrir þessa myndarlegu konu ef soggreinin á kallinum yrði þess valdandi að hún næði því að verða útnefnd fyrir demókrata. 

Hillary tjáir sig um Lewinsky-málið

Kastljósið á "settum dómsmálaráðherra."

Er í þessum orðum að horfa á niðurlag viðtals við "settan dómsmálaráðherra". Það eru mörg, mörg ár síðan ég hef séð svona slælega framgöngu spyrils í Kastljósinu. Meðan "settur dómsmálaráðherra" blaðraði út í eitt um hvað aðilar ráðgjafanefndarinnar væru heimskir og illa upplýstir, lagði spyrillinn kollhúfur framan í "hann" og leyfði honum að eyða tímanum án þess að stöðva bullið í honum. Eftir þessa dæmalausu sleggjudóma sem "ráðherrann" lét frá sér fara, hlýtur að vakna sú spurning hvort einhver sómakær persóna fæst til að fylla upp í hausatölu í því sem kallað er ráðgefandi.Niðurstaðan er sú að Dagfinnur er dómbærari en dómarinn. 

Alvörumál!

Hver er skyldur hverjum. Hvur er hvurs og hvurs er hvað í þessu tilfelli? Skyldu veðbankar taka til starfa í tilefni úthlutunar þessa bitlings?

Alltaf skal maður sjá einhverjar spennandi gleðifréttir þegar maður kíkir á mbl.is. Ég held ég geti varla sofnað fyrr en þetta mál verður leitt til lykta.

9 sóttu um embætti hagstofustjóra

Kastljós.

Ég sá kastljós í gærkvöldi þar sem m.a. var viðtal við konu sem hafði verið vistuð á upptökuheimili við Efstasund í Reykjavík. Mikið hefur gengið á vegna uppljóstana á meðferð drengja í Breiðuvík. Nú koma upplýsingar frá Kumbaravogi, Efstasundi og ef til vill víðar.

Ég ætla reyndar að lýsa furðu minni á að konan sem starfaði sem félagsmálastjóri Mosfellsbæjar á þeim tíma sem stúlkan var vistuð í Efstasundi, skuli enn vera starfandi félagsmálastjóri í Mosfellsbæ. Það er alveg deginum ljósara að konan vissi fullvel, hvernig meðferðin var á þessu heimili.

Hvernig er staðan í þessum málum í dag?

Ekki ætla ég þeim aðilum sem vista börn við þessar aðstæður í dag, að þau misnoti eða misþyrmi þeim en vernig er eftirliti með þessum málum háttað?

Lýsingar þessara vesalings einstaklinga eru þyngri en tárum taki og alveg með hreinum ólíkindum hvað lengi þetta fékk að viðgangast.

Þess vegna spyr ég!

Hver er staða þessara mála í dag? Getum við átt von á að fá samskonar eftirmála eftir 30-40 ár og við höfum fengið frá undangengnum áratugum af þessum upptökuheimilum? Getum við trúað því að þessi mál séu í ásættanlegum farvegi í dag?

Það eru rekin upptökuheimili í dag og svo sannarlega verðum við að vera viss um að þar séu mál í lagi.

Við hæfi.

Jæja þá er komið að því!

Á þessum tímamótum er við hæfi að óska lesendum sínum á þessum vettvangi, hæfilegs ófriðar en þó, gleðilegs nýárs. Gætum þess að ládeyðan nái ekki tökum á okkur því þá verður komandi ár bara leiðinlegt.

Ég ætla að gefa sjálfum mér áramótaheit. Ég ætla að léttast um 8.000 grömm á árinu sem senn byrjar. Ég er núna 80+.

Gleðilegt nýár öll og takk fyrir það sem er að líða.

Er öl, innri eða ytri maður.

Er nú svo illa komið fyrir bankamafíunni að hún þurfi að bera mútur á ráðherra? Yfirspenntur fjármálamarkaðurinn hellir uppá ráðherraliðið. Mega ráðherrarnir við þessu? Hvað skyldi birtast á bloggsíðu Iðnaðaráðherrans eftir að hann hefur hroðið sprúttið "sitjandi á nærbuxunum einum fata um miðja nótt", eins og einhver lýsti.

Auðvitað eiga ráðherrarnir að sýna þjóðinni þann sjálfsagða sóma, að skila þessari mútugreiðslu í snatri. Ráðherrarnir Össur Skarphéðinsson og Þorgerður Katrín Gunnarsdóttir sýndu þjóðinni mikla óvirðingu í Silfri Egils í dag, þegar þau skelltu bara í góm og glottu, þegar þáttastjórnandinn spurði hvort þau mundu skila mútunum. Svona er framkoma fólks sem heldur að það eigi heiminn og allt sem í honum hrærist.

Ég segi skál í mínu eigin heimalagaða rauðvíni.

Var annars nokkuð einhver árans hrekkjalómur úr framsóknarflokknum að búa þessa frétt til?

Þar fór það!

Þá er úti um þá von hjá manni. Andsk. meðferð á traustum (viðskipta)vini. Og ég sem hélt að ég kæmist loksins á boðslistann eftir 33. ára taumlausa þjónkun. Kannske lækka þeir bara útlánsvextina á mér í staðinn og koma meira jafnvægi á vaxtamuninn. Vona allavega að fyrst við þurfum ekki að borga kokteilinn og pinnamatinn oní dýrtseldustu kúnnana, skili þetta aðhald sér í betri kjörum til okkar almennra rekstraraðila þessarar lánastofnunar.

Megi Guð láta gott á vita. Ég hef ekki oft fengið heppilegri jólagjöf.

Engin nýársveisla hjá Glitni

Jólaglaðningur.

Hérlendis er gefið út dagblað sem nefnist "24stundir" eða "sólarhringur" eins og Sigurður G Tómasson kallar það. Á baksíðu þess blaðs í morgun sá ég þá mestu gleðifrétt sem, en sem komið er, hefur glatt mig hvað mest fyrir þessi jól. Sumsé, íslenskir """athafnamenn""" ætla að styrkja kínverskan skipasmíðaiðnað. Gleði mín felst í því að þarna munu kínverskir skipasmiðir og iðnverkamenn á þeirra snærum, sjá fyrir endan á bágum lífskjörum sem hafa fylgt þeim til þessa dags.

Að sjálfsögðu munu íslensku """athafnamennirnir""" víkja að þeim góðum greiðslum fyrir greiðann eins og þeir hafa allsstaðar gert hvar sem þeir hafa komið og verið þiggjendur.

Ég trúi því að landslýður muni gleðjast með mér þegar hann gerir sér grein fyrir mikilvægi þess að íslenska útrásin endi alla leið í Kína en þar mun víst vera talsverður skortur á að laun séu mannsæmandi en úr því munu hinir íslensku """athafnamenn""" bæta snarlega trúi ég.

Rétt þykir mér að við hinir sem ekki leggjum í svona framkvæmdir, heiðrum þessa landa okkar á eins veglegan hátt og okkur er unnt. Ég geri hér með þá kröfu til "sólarhringsins", að blaðið nafngeini þessa """menn""" svo við hin getum sýnt þeim hvað við berum mikla virðingu fyrir afli þeirra og áræði.

Að svo mæltu, óska ég landslýð öllum gleðilegra jóla og farsældar á komandi ári og vona að allir séu sáttir við sitt.

Hátíð fer í hönd með ýmsu sniði.

Flest bendir til að við Íslendingar siglum inn í jólahátíðina á m/b Yfirdrætti RE eftir skuldafeni sem er mjög auðrötuð siglingaleið hér innanlands. Skelfileg afleiðing góðæris í gerfi himinhárrar skuldasöfnunar heimilanna í landinu í formi yfirdrátta hlýtur að enda með ósköpum. Ég velti mikið fyrir mér hvort þessi staða skapi þessa ofboðslegu góðærismælingu á okkur í samanburði við aðrar þjóðir.

http://www.blog.central.is/traveller

Ég bið þig lesandi góður að kíkja ofurlítið á þessa síðu hjá dóttur minni. Hugsaðu áður en þú hendir frá þér tækifærinu til að öðlast ofurlitla sálarró í svartasta skammdeginu. Ég er ekki í vafa að hægt er að fá ríflegan yfirdrátt á kostakjörum til að styrkja hin ýmsu svæði í heiminum sem standa höllum fæti. Mér þykir líklegt að hægt sé að höfða til samvisku lánadrottnanna og daganna sem í hönd fara, til að særa út annaðhvort greiðslufrest eða nýjan yfirdrátt í því skyni að koma til aðstoðar bágstöddum í einhverju landi sem standa skör neðar en við á yfirdráttarvelmegunarmæli alþjóðasamfélagsins.

Hörmungarástand.

Það eru engar smá upphæðir sem lánastofnanir taka til sín í formi vaxta af yfirdráttarskuldum. Ekki að undra þótt þær sýni einhvern hagnað. Gaman væri að sjá hagnaðarmyndun innanlands sérstaklega hjá þeim.

Þetta er góðærið í sinni björtustu mynd.

Hvenær kemur að skuldadögunum.

Sitja þessir lánadrottnar ekki uppi með fullt af verðlausum fasteignum, handónýtum bílum eða bara með glatað fé?

Yfirdráttarlán aldrei hærri